雖然本港疫情似乎有點緩和的趨勢，但係據聞某電視台的一班節目編劇，唔知係咪WFH得太耐，仍然呆呆滯滯，個腦塞住塞住，苦無好橋，唔知點算？！於是小編就獻計畀佢哋，幫佢哋搞咗個「《廿三樓．搞笑友》齊齊度橋吹水會」，希望能夠集結各路江湖手足，齊齊為廿三樓一班就嚟畀人“You’re Fire!”的編劇，出謀獻策，挽救廿三樓呢個福地！
由UA CineHub及劇場空間聯手打造的《影視．小説．劇本 跨界空間》，將於5月26日起，一連五個星期，於K11 Art House舉行多場節目，打響頭炮的是劇本朗讀會 - 《廿三樓．搞笑友》。此劇本改編自百老匯著名編劇Neil Simon的半自傳式作品《Laughter on the 23rd Floor》，原著劇作榮獲艾美獎提名，劇場空間曾於1996年上演，並由劇壇鬼才司徒偉健翻譯、改編，以抵死幽默的風格，從香港娛樂圈講到社會時弊，獲該年度「九大最受歡迎舞台劇」，倪秉郎更憑此劇勇奪最佳男主角。2020年版加入陳志雲「主席」，以他「真的假不了」的電視台經驗，參與今次讀劇會，與倪秉郎及一衆演員在台上拿着劇本，真身演讀台詞，肯肯定笑到四萬加個Thx!
由於疫情一度嚴峻，令人既擔心又無奈，連小編都怕今次節目又要取消，(最近頻頻被Cut Show，小編覺得食生菜食到滯，你地係諗唔到小編有幾想見到大家架喇)，不過古語有舊雲：「踏破鐵鞋盧覓雪！」小編正式宣佈：劇本朗讀會 - 《廿三樓．搞笑友》終於可以預期開Show喇！為了讓大家更了解到底志雲「主席」同埋阿郎哥，喺廿三樓搞乜鬼咁搞笑，小編決定於5月14日下午4:30，邀請兩位搞事人一齊開個網上見面會，與粉絲們齊齊度度橋、吹吹水，講講今次讀劇會，以及交流一下，疫情中大家的生活狀況！此外，小編仲邀請咗今次合作夥伴娛藝(UA)院線董事總經理黃嗣輝先生及劇場空間藝術創作總監余振球，一齊傾下計，講下佢哋點解會有呢次咁新穎嘅合作！
你有無咩嘢想問想知想講，到時不妨登入網上見面會，大家先隔空見個面，Say個Hi，之後再喺K11 Art House重聚啦！
《廿三樓．搞笑友》齊齊度橋吹水見面會將於5月14日下午4時30分開始，參與辦法呢兩日會公佈，密切留意小編嘅PO喇！Mark定日期時間啦！